نشوى مصطفى تكشف: فنانة قالت لـ هشام سليم نفسي أحج.. تاني يوم حجز لها وسافرت

موقف إنساني يعكس طيب المعدن ونقاء القلب كشفت عنه الفنانة نشوى مصطفى، للفنان الراحل هشام سليم، الذي رحل عن عالمنا أمس، بعد صراع مع مرض السرطان.

موقف إنساني لـ هشام سليم

وقالت نشوى مصطفى عبر حسابها الشخصي بموقع التواصل الاجتماعي فيس بوك،:” افتكرت حاجة عن هشام سليم يمكن مش كتير يعرفوها، في يوم راجعة من التصوير، وكان فيها أستاذة ممثلة كبيرة الله يرحمها اسمها ثريا إبراهيم، قالت لي نشوى معنديش عربية توصليني في طريقك لأقرب مكان انزل أخد تاكسى —قلت لها تاكسي ازاي هوصل حضرتك لباب البيت”.

وأضافت: “واحنا ماشيين قالت لي عارفة الشقة اللي حتوصلينى ليها دي مين جابهالي، قلت لها مين، قالت لي شيريهان، وحكت لي إنها كانت بتشتغل معاها مسرحية شارع محمد علي وكانت بتيجي كل يوم من طنطا للقاهرة، وترجع تاني لأن بيتها كان هناك، ولما شريهان عرفت قالت لها شوفي الشقة اللي تحبيها وأنا اشتريهالك، ولما اشترتها كانت فرحانة”.

 دفع 50 ألف تكلفة حج ثريا إبراهيم

وتابعت نشوى: “هشام سليم عرف بارك لها وقال لها فرشتيها، ولا لسه قالت له فرشتها قال لها كان نفسى أفرشهالك قالت له، وهى بتهزر طيب ما تعمل حاجة تانية قال لها تحت أمرك، قالت له نفسى أحج.. تاني يوم لقت شركة سياحة بتكلمها، وبلغتها إن هشام دفع كامل التكلفة وكانت خمسين ألف جنيه وكمان وهى رايحة عطاها مصروف الرحلة وقال لها: ادعى لي بس كده.. ألف رحمة ونور”.